Wala man sang problema sa alkalde sa banwa sang Cauayan, Negros Occidental kun may yara sang magkontra sa iya sa maaboty nga 2025 midterm election.
Sa interview sang Bombo Radyo Bacolod kay Mayor John Rey Tabujara, demokrasya ang Pilipinas gani indi man mapunggan kung may yara sang magakontra sa iya agud nga magpadalagan bilang alkalde kag magaserbe man sa banwa sang Cauyan.
Ini kasunod sang pagpahayag ni Engineer Jury Nabaja nga siya na ang kandidato nga magapadalagan bilang alkalde sa banwa sang Cauayan sa idalom sang PDP Laban nga magabunggo kay Tabujara.
Suno kay Tabujara, sa pagpungko sini bilang alkalde sa banwa, wala man ang mga ini naulihi sa basic services.
Suno sa alkalde ang mga pumuluyo sa banwa sang Cauayan ang ginahatagan sang nagakaigo nga bulig nagikan sa Department of Social Welfare and Development (DSWD).
Suno diri, madamo na ang nakabenepisyo sa mga hospitalization, health services kasubong man sa libre nga bakuna.
Suno kay Tabujara may isa pa ka termino siya agud nga magpungko bilang alkalde sa banwa sang Cauayan kag ginpahayag man sini nga indi man ini magdugay sang kapin 17 anyos bilang alkalde sang banwa kun indi maayo ang serbisyo nga ginahatag sa mga pumuluyo.
Samtang wala pa nagdeklarar sang state of calamity ang banwa sang Cauayan apisar nga nagdangat na P66.1 million ang balor sang halit sang tuman nga kainit sang panahon bangud may sila sang nagakaigo nga pondo agud ibulig sa mga apektado.
Bangud sini nagapatigayon man sang water rationing ang banwa bangud wala na sang tubig ang mga pumuluyo.
Magluwas diri nagahatag man sang livelihood ang banwa para sa mga apektado sang El Niño.
