Ginakahangawa sang alkalde sa banwa sang La Castellana nga indi masarangan sang ila nga pondo ang pagsustiner sang mga evacuees tuga sang mga aktibidad sang Bulkan Kanlaon.
Sa interview sang Bombo Radyo Bacolod kay Mayor Rhumyla Nicor Mangilimutan, kun malawigan pagid ang pagtinir sang mga evacuees sa evacuation centers, maapektuhan na ang budget sang banwa.
Suno diri, sa 13 ka Barangay, indi pwede nga sa lima ka apektado nga barangay lamang magakadto ang pondo.
Paathag sini nga gamay lamang nga banwa ang La Castellana kag ang ila nga local tax allotment lakip na ang local income, ang ginabanta nga magadangat lamang sa P355 million.
Samtang P17 million lamang ang disaster fund gani ang magamit nga 13 percent nga quick response fund ang yara lamang sa kapin P5 million.
Apang sa isa ka adlaw, nagdangat sa P400,000 tubtob P500,000 ang ginagastos sang banwa sa pagpakaon pa lamang sa halos lima ka libo nga mga evacuees kag volunteers.
Suno diri, wala pa makaabot ang local tax allotment para sa subong nga Enero gani savings na lamang ang ila nga ginagamit, apang ang P15 million nga savings ang halos maubos naman.
Ginapasalamatan man ni Mangilimutan nga may nagaabot nga donasyon, apang ini ang indi man makasustiner, kag kinahanglan gid nila ang bulig sang provincial kag national government.
Suno diri, ang foodpacks nga gikan sa Department of Social Welfare and Development (DSWD) ang lunsay delatas lamang, gani ini ang ila ginaluto nalang sa pamahaw.
Panindugan sang alkalde nga ang banwa na ang nagagastos sa panyaga kag panyapon bangod indi man mahimo nga lunsay ang mga delatas lamang ang ila ipakaon sa mga evacuees.
Samtang nagasakit naman ang buot ni Mangilimutan sa mga mabatian nga alegasyon nga ang mga opisyal ang nalipay kun may kalamidad agud makabulsa sang budget.
Panindugan sini nga wala nila ginakalipay ang pagpulaw bugtaw sa pag-atubang sang kalamidad, kag kun ila pagid ibulsa ang budget sila ang wala sang ipakaon sa mga evacuees.
