Dako ang pasalamat sang alkalde sa banwa sang La Castellana sa ginpalab-ot nga bulig ni Vice President Sara Duterte para sa mga evacuees gikan sa Bulkan Kanlaon.
Sa interview sang Bombo Radyo Bacolod kay La Castellana Mayor Rhumyla Nicor Mangilimutan, nakaligad nga semana nagdangop ini sa Office of the Vice President (OVP) agud magpangayo sang assistance.
Duha ka adlaw antes ang pagbisita ni VP Sara, nagkadto man mismo ang mga OVP staff agud tsekyaron ang sitwasyon apang wala man may nakamensyonar tuhoy sa pagbisita sang Bise Presidente.
Gani nasupresa ini nga ginpadulungan sila ni VP Sara kahapon.
Suno sa alkalde, dako nga bulig ang ginhatag nga 25 kilos nga bugas sa kada pamilya.
Paathag sini nga ang provincial government ang masami nga nagapakaon sa mga evacuees, lakip na ang kan-on kag sud-an, apang may tion nga naga-untat ang mga ini.
Gani una na sini nga nanegosyar sa mga evacuees nga sa tion nga mauntat ang assistance sang provincial government, ang mga nabatun sang kada pamilya nga bugas na lamang ang tig-angon agud sud-an na lamang ang kinahanglan gastuhan.
Paathag sini nga apektado na ang budget sang banwa kag probinsya partikular na ang budget nga natalana kuntani sa iban nga programa.
Nalawigan man sa banwa ang Bise Presidente bangod siya ang nag-atubang pa sa media kag nagroom-to-room sa eskwelahan nga nagaserbe nga evacuation site.
