Nagpanawagan sang pangamuyo ang alkalde sa banwa sang La Castellana matapos ang liwat nga paglupok sang Bulkan Kanlaon.
Sa datos sang PAGASA, ang explosive eruption ang nag-umpisa alas-5:51 sang aga, kag na-untat alas-6:47 sang aga.
Sa interview sang Bombo Radyo Bacolod kay La Castellana Mayor Rhumyla Nicor Mangilimutan, wala sang nabatian nga pagsigabong sa baylo hinali lamang nga nagbusawak ang madamol nga aso gikan sa crater sang bulkan.
Sa monitoring sini sa pila ka mga pumuluyo, may mga narecord na nga ashfall sa pila ka mga Barangay kag may mga report man nga nagalinagatik ang atup nga nagakahulugan nga ini ang may kaupod nga magagmay nga bato.
Nag-abiso naman ini sa Municipal Disaster Risk Reduction and Management Office sa pagsupender sang klase sa tanan nga lebel sa banwa sang La Castellana.
Isa sa karun sa ginatun-an nila kun ano ang mangin tikang para sa mga ginhatagan sang passess sa pagsulod sa 6 km extended danger zone.
Panawagan sini sa mga pumuluyo nga magpangamuyo kag indi gilayon magpati sa mga fake news.
Sa baylo, panugyan sini nga magpamati sa mga reliable sources kaangay sa mga ahensya sang gobyerno para sa mga abiso.
Ginapakamaayo man sini nga wala pa napahanugutan nga makapauli ang kapin 4,500 nga mga Internally Displaced Persons (IDPs).
Apang aminado ini nga naubos na sang banwa ang ila Quick Response Fund para subong nga 2025 nga yara lamang sa P5.8 million kag ginalantaw sini nga maapektuhan na ang Maintenance and Other Operating Expenses (MOOEs) sang iban nga mga departamento sa banwa.
Sa karun, ginahulat pa nila nga maaprubahan ni President Ferdinand “Bongbong” Marcos Jr. ang surplus fund sang 2024 nga yara sa P21 million.
Paathag ni Mangilimutan nga magluwas sa ginapakaon nga 4,500 evacuees, may mga ginapakaon pa sila nga mga volunteers kag bisan ang Philippine Red Cross ang naga-ako nga indi naman makasarang.
