Nagpanawagan ang alkalde sa banwa sang La Castellana sa mga residente nga wala pa nag-evacuate gikan sa apektado nga mga lugar sang paglupok sang Bulkan Kanlaon, nga magpanaog na kag magtinir anay sa evacuation centers.
Sa interview sang Bombo Radyo Bacolod kay La Castellana Mayor Rhummyla Nicor Mangilimutan, 277 ka pamilya sa karun ang nagatinir sa tatlo ka evacuation center ang banwa.
Panawagan sini sa mga wala pa nag-evacuate nga magpanaog na agud indi na mabudlayan pa ang mga responders sa pagrescue sa tion nga maglala ang sitwasyon.
Dugang pa sini nga mas mahapos sa ila ang pagtatap sa mga apektado nga residente kun sila ang yara lamang sa isa ka area kay may-ara pa sang medical team nga sarang makahatag sang medical assistance sa mga may ginabatyag kaangay sang hapo bangod sa abo kag tuman ka isog nga baho sang asupre.
Ang masobra 400 nga evacuees gikan sa Sitio Tamburong, Barangay Bi-ak na Bato, kun sa diin natabo ang lahar flow, ang temporaryo naman nga nagatinir sa La Castellana National High School.
Nagpaandam man ini sa mga motorista nga magalabay sa Sitio Tamburong, bangod madanlog pa ang dalan ilabi na nga wala pagid matapos ang clearing operation apisar sa 25 ka dump truck na ang nahakot nga lahar.
Sa pihak nga bahin, water supply naman para gawion kaangay sa pagpaligo ang labi nga ginakinahanglan sang mga residente, bangod sila ang bastante man sang mainom nga tubig gikan sa Negros Occidental Provincial Government kag nagpahulam man ang pila ka banwa kag ciudad sang water tanker kag purifier.
Bastante man ang mga ini sa pagkaon, apang sa karun ginakulang sang facemask kag bulong sa hapo.
Dako naman ang pagpasalamat sang alkalde sa tanan nga mga nagbulig.
