Ginakondenar sang alkalde sa banwa sang Murcia ang natabo nga massacre sa tatlo ka miyembro sang isa ka pamilya sa Sitio Guinam-an, Barangay Buenavista, Murcia, Negros Occidental sang Hwebes sang gab-i.
Ang mga biktima ang ginlakipan sang amay nga si Neldy Celayes, 59 anyos, iloy nga si Josephine Celayes, 60 anyos kag ang ila bata nga si Jovie Celayes, 33 anyos.
Sa interview sang Bombo Radyo Bacolod kay Murcia Mayor Gerry Rojas, dapat mapanabat ang suspect sa brutal nga pagpatay.
Naghatag naman ini sang mando sa Murcia Municipal Police Station nga maidid nga imbestigaran ang kaso.
Paathag sini nga kun may-ara man sang mga maggwa nga persons of interest sa kaso, indi paman nila mapagwa ang pangalan bangod sa kakulangan sang ebidensya.
Mando sini sa kapulisan nga indi mag-untat tubtob indi masolbar ang kaso kag mapapapanabat ang mga perpetrators.
Ini bangod tubtob indi madakpan ang mga nagpatay, magapabilin man ang kahadlok sang mga pumuluyo sa palibot.
Pasalig naman sang alkalde sa mga pumuluyo, nga siya ang hugot nga magamonitor sa imbestigasyon.
Panawagan sini sa may impormasyon nga magkoordinar sa kapulisan agud makabulig sa pagsolbar sang kaso.
Bangod election period kag may spending ban, indi man ini makatanyag sang reward, apang ini ang mahimo ma-estoryahan matapos ang eleksyon.
