“Bad” ang ginhatag nga ratings ni Cadiz City Mayor Salvador “Bading” Escalante sa performance sang PrimeWater.
Sa interview sang Bombo Radyo Bacolod sa alkalde, sadto nagaproblema na ang ila nga water district bangod indi na nila masarangan ang pagsupply sang tubig sa 8,000 households.
Suno diri, billion pesos ang ila nga gastuhon para sa pagprovide sang tubig, tubtob nga nagsulod ang PrimeWater paagi sa Joint Venture Agreement (JVA).
Suno kay Escalante, maayo gid sadto ang performance sang PrimeWater apang sa padayun nga development sa ciudad, nagsaka sa 14,000 households ang populasyon sa Cadiz City, gani bisan ang PrimeWater ang indi naman makalagas sa demand.
Nagdangat nga nagpaandam na si Escalante nga magadeklarar sang water crisis bangod sa kakulangan sang tubig, gani agud masulosyonan, ginpasakaan sang PrimeWater ang ila capacity.
Ang anay duha ka 40-horsepower pumps ang gin-expand nila sa tatlo ka 60-horsepower pumps.
Apang ini ang nagakinahanglan man sang maintenance bangod may tion nga nagabisyo na.
Dugang pa sini nga nagataas pa ang konsumo sa tubig sa tion sang summer.
Bangod sini, gintap nila liwat ang Water District kag ginhatagan sang area nga supplyan sang tubig.
May nabatian naman ini sadto nga ginabaligya na ang PrimeWater, kag sini lamang nakumpirmar sang naglupok ang balita.
Suno diri, may maayo man nga track record ang nakabakal nga sa nahibaluan sini operator man sa Manila, gani nagalaom ini sang mas maayo nga serbisyo.
Apang paandam sini nga kun indi pagid mag-imprubar ang serbisyo sang PrimeWater, panubuan nila ang area nga supplyan sini sang tubig kag ipatake-over sa Water District.
May mga waetr supplier man nga willing nga magsulod, apang indi luyag magkontrata sa PrimeWater sa kahangawa nga indi mabayaran.
Sa baylo, sila ang nagapakig-angot sa Cadiz City Water District./
