Ginpanginbulahan kag gindayaw sang alkalde sa ciudad sang Cadiz ang mga kapulisan sa ciudad matapos nga madakpan ang suspek nga brutal nga nagpatay sa 17 anyos nga dalagita sa Purok Masinolondon, Barangay Magsaysay, Cadiz City.
Suno kay Cadiz City Mayor Salvador “Bading” Escalante, nagpasalamat ini sa madinalag-on nga operasyon sang mga kapulisan sang ciudad nga nadakpan ang suspek apisar nga nagpalagyo pa ini sa ciudad sang Kabankalan.
Suno kay Escalante, sang Lunes, nagpatigayon sang flag ceremony sa ciudad kag nameet sini sa una nga kahigayunan si Plt. Col. John Joel Batusbatusan, ang bag-o nga officer-in-charge sang Cadiz City Police Station kag naestoryahan nila ang sensitibo nga kaso kun sa diin ginmanduan niya ini nga kinahanglan nga madakpan ang naghimo sang krimen kag mapasakaan sang kaso.
Sang Lunes sang gab-i gintawgan niya ang hepe kag nagpangayo sang update.
Ginkalipay man sini nga natigayon nga madakpan ang suspek kahapon sang aga.
Suno sa alkalde, ginalantaw sini nga may yara sang indi maayo nga nagakatabo bangud indi lang ini ang una nga bes nga natabo ang kaangay nga insidente sa Barangay Magsaysay kag isa sa nakita sini nga rason ang paglantaw sang indi maayo nga lalantawon.
Suno diri, P10 mahimo na makalantaw sang indi maayo nga lalantawon.
Samtang ginpahayag sini nga ang importante sa karun ang nadakpan na ang suspek kag napasakaan na sang kaso agud man nga mahatagan sang hustisya ang makasilidni nga kamatayon sang 17 anyos nga dalagita.
Nakahatag naman ang city government sang P20,000 para downpayment agud nga maembalsamar na ang bangkay sang dalagita kag nagpasalig man ang alkalde nga mahatagan sang bulig ang nalisdan nga pamilya.
