Ginapa-assess na sang alkalde sa ciudad sang Cadiz kun ano pa ang sarang nga mabulig sang Cadiz City Government sa nabilin nga himata sang 17 anyos nga dalagita nga brutal nga ginpatay kag ginlugos sang iya ginakabig na nga lolo sa Purok Masinolondon, Barangay Magsaysay, Cadiz City.
Madumduman nga namissing ang biktima sang Enero 7, kag nakita ang bangkay sini sang Enero 8 sa katubuhan, wala sang panapton, utod ang walo ka tudlo sa kamot, utod ang dulungan kag halos mautod naman ang liog.
Nakumpirmar man sa medico legal nga ini ang may laceration, nga nagapamatuod nga ini ang ginhimuslan.// Nadakpan naman sang Enero 9 sa Barangay Tampalon, Kabankalan ang tatay sang iya nga stepfather nga si Federico Delfin, 62 anyos nga napasakaan na sang kaso nga rape with homicide kagab-i.
Sa interview sang Bombo Radyo Bacolod kay Cadiz City Mayor Salvador “Bading” Escalante, sila na ang nagpabalsamar sa biktima kun sa diin gikan sa inisyal nga sukot nga P27,000 nagpaayo ang embalmer gani ang sobra ang ginhatag na lamang nila sa pamilya.
Suno sa alkalde, ginpadulongan naman sini sang personnel sa Department of Social Welfare and Development (DSWD) agud magtsekyar sang sitwasyon sang pamilya kag kun ano pa ang sarang mabulig sang Cadiz City Government.
Pasalig ni Escalante, nga indi matapos sa paglubong ang ila nga bulig, bangod sila ang magapadayun man tubtob sa makabangon na ang pamilya.
Pahayag sang alkalde nga nakasugtan nga sa Macabal-ong Baptist Church na lamang sa Sitio Macabal-ong, Barangay Magsaysay, Cadiz City ihaya ang bangkay agud maka-akomodar ang mas madamo ilabi na nga suludlon pa ang ila orihinal nga balay.
Sa pihak nga bahin, nagpanaog na sang instruction ang alkalde sa Cadiz City Police Station nga ipaidalum sa drug test ang suspetsado bangod ginalantaw nga indi mahimo sang persona nga yara sa normal nga paminsaron ang nasambitan nga krimen.
Ginpasalamatan naman sang magulang nga babayi sang biktima sa bulig gikan sa Cadiz City Government kag iban pa nga nagbulig agud maangkon nila ang hutisya kag madakop ang suspetsado.
Ang utod nga naghingyo nga indi na hingadlan, amo ang una nga nagbantay sa Cadiz City Police station sang nag-abot ang suspetsado gikan sa Kabankalan City, kun sa diin matapos ang mugshot, wala ini nakapugong kag iya nga gin-atubang kag gintampa ang kuntani makabig na nga lolo.
