Preparado na ang mga opisyales sang La Carlota City sa pag-abot ni President Ferdinand “Bongbong” Marcos Jr bwas agud magbisita sa Bulkan Kanlaon evacuees.
Sa interview sang Bombo Radyo Bacolod kay La Carlota City Mayor Rex Jalando-on, ang South 2 Evacuation Center lamang ang padulungan sang Presidente, gani plano nila nga tipunon na lamang diri ang mga evacuees sang ciudad.
Suno sa alkalde may kapin 300 ka pamilya ukon isa ka libo nga indibidwal nga nagatinir sa karun sa mga evacuation centers.
Ginalantaw sini nga mga evacuees sa La Carlota City lamang ang tipunon kag wala na madala ang gikan sa banwa La Castellana bangod gamay ang venue nga ginpili sang Presidential Management Staff.
Pahayag ni Jalando-on nga isa sa mga igarequest sini sa Presidente ang financial assistance nga gamiton sa pagpapakaon sang mga evacuees.
Aminado ini nga masarangan paman sang ila nga budget apang indi pa mapaktan kun tubtob san-o magadugay ang pagtinir sang mga evacuees.
Dugang pa sini ang assistance nga ihatag matapos ang decamping, kalakip na ang pagpakaon sa mga kasapatan.
Pahayag sini nga kun magsaka sa Alert Level 4 ang status sang bulkan, mahimo magsaka sa 7,000 ang evacuees.
Willing man ini nga magreallign sang iban nga pondo agud magamit, apang paathag ni Jalando-on nga kinahanglan ang para sa mas malawig nga pondo.
Magluwas diri, ang alkalde ang may Agrarian request man kalakip na ang residential lot para sa relocation site sang mga pumuluyo sa sulod sang 6km Danger Zone.
Apang magluwas sa pagbisita sang Presidente sa evacuation center, magabisita man bwas si Senator Imee Marcos sa La Carlota City gym, para sa Assistance to Individuals In Crisis Situations (AICS) distribution.
