Ginpangunahan ni Silay City Mayor Joedith Gallego ang pagselebrar sang ika 126th Al Cinco de Noviembre sa ciudad sang Silay.
Ang tema sang selebrasyon amo ang ‘Aton Baganihan nagpanindugan , Sila tanan aton Pasidunggan’.
May ginpatigayon nga re-enactment sang natabo nga rebolusyon sadtong Nobyembre 5, tuig 1898 sa Cinco De Noviembre mark point.
May yara man sang parade nga ginhiwat nga gintambongan sang government ofiicials, Silay City Police Office, Bureau of Fire Protection (BFP), Bureau of Jail Management and Penology (BJMP) kag Barangay 3 nga sakop ang Cinco De Noviembre mark point.
Sa mensahe ni City Mayor Joedith Gallego, ang Silaynon ang nangin kabahin sa mga lideres nga nagplano sang rebolusyon agud lutoson ang katsila sa isla sang Negros.
Sa norte nga bahin sang Negros ginpangunahan ni Aniceto Ledesma Lacson ang rebolusyon samtang sa sur nga bahin naman amo si Juan Anacleto Araneta.
Suno kay Gallego, una nga ginpasaka ang hayahay sang Pilipinas sa Silay City Public Plaza.
Ang hayahay ang ginburda ni Olympia Severino kag utod kag pakaisa sini.
Dugang pa sini, bugal nga mahambal nga ang una nga gobernador sa Negros ang isa ka matuod nga Silaynon nga amo si Melecio Severino.
Pahayag ni Gallego, padayon nga nagatrabaho ang gobyerno agud mapadayon ang success sang ciudad kag probinsya.
