Ginhingyo sang alkalde sa ciudad sang La Carlota kay President Ferdinand “Bongbong” Marcos Jr. nga kun mahimo nga monthly ang paghatag sang bulig sa mga evacuees sang Bulkan Kanlaon.
Sa interview sang Bombo Radyo Bacolod kay La Carlota City Mayor Rex Jalando-on, kapin 100 ka pamilya ang nahatagan sang tigduha ka family food packs kag P5,000 nga cash assistance sa pagbisita sang Presidente sa evacuation site.
Apang aminado ang alkalde nga magluwas sa mga yara sa sulod sang evacuation centers, may kapin 100 pa nga Internally Displaced Persons (IDPs) nga temporaryo nga nagatinir sa ila mga himata ukon abyan.
Paathag ni Jalando-on nga sa nakaligad nga distribusyon, nagsunggod ang mga outside evacuation centers bangod apisar sila ang apektado man, wala ang mga ini nahatagan.
Gani ginrequest ni Mayor Rex kay Rex Gatchalian, tiglikom sang Department of Social Welfare and Development (DSWD) nga malakip sa mahatagan ang mga outside evacuation centers.
Nagcommit naman si Secretary Rex nga magapadala sang dugang nga ayuda para sa mga ini.
Sa pihak nga bahin, gin-athag ni Mayor Rex nga lunsay mga evacuees sa La Carlota lamang ang nahatagan kahapon, apang yara man ang mga opisyales sang Bago City kag La Castellana sa Negros Occidental kag Canlaon City sa Negros Oriental, nga lunsay nagrequest man nga mabuligan ang ila mga evacuees.
Sa karun wala pa sang commitment gikan kanday Presidente Marcos kag Secretary Rex natuhoy sa request ni Mayor Rex nga himuon kada bulan ang paghatag sang ayuda.
