Mas nagakahangawa ang alkalde sa La Carlota City sa mga nagaluntad nga volcanic quakes kun ikumparar sa halit sang ashfall kag baho sang asupre.
Sa interview sang Bombo Radyo Bacolod kay La Carlota City Mayor Rex Jalandoon, ginakapamaayo sini nga humalin sang natabo ang phreatic eruption sang Hunyo, wala gid naapektuhan ang ila nga source of water.
Sang tinalikdan nga adlaw, napanimahuan man sa La Carlota ang asupre kag may pila ka area nga nakaeksperyensya sang manipis nga ashfall.
Apisar nga ini ang mahimo magcontaminate sa surface water, mas nagakahangawa si Jalandoon sa mabaskog nga volcanic quakes.
Ini bangod kun magkusog pagid ang pagtay-og, mahimo magcollapse ang pila ka underground water ways nga padulong sa mga suba kag busay kaangay sang Barangay Araal kag Gintubhan kun sa diin may-ara sang waterfalls ukon watershed.
Aminado ini nga sila ang mabudlayan sa paglocate kun sa diin naman magalusot ang tubig ukon mahimo maghinay ang tubod kun nagbag-o ang underground rock formation.
Ginapakamaayo na lamang sini nga nagapabilin nga mahinay ang magnitude sang nakaligad nga mga pagtay-og.
Sa pihak sini, ang ciudad ang nakapreparar naman hinali magkaproblema sa water source.
Suno kay Jalandoon, sila ang nakaprocure na sang water truck kag water filtration kag sila ang magabakal sang dugang nga set sa masunod nga tuig.
