Gin-athag sang alkalde sa banwa sang La Castellana nga ang pinakachallenge nila sa karun amo ang pagpakaon sang mga evacuees.
Sa interview sang Bombo Radyo Bacolod kay La Castellana Mayor Rhummyla Nicor Mangilimutan, sa una pa lamang nga paglupok sang Bulkan Kanlaon sang Hunyo, naubos na ang ila nga quick response fund.
Dako man ang pagpasalamat sini sa mga nagpalab-ot sang bulig, gikan sa provincial government, mga kongresista sa Negros Occidental, nanarisari nga local government unit, kag mga pribado nga organisasyon kag indibidwal.
Kasubong man ang pagbulig ni President Ferdinand “Bongbong” Marcos Jr. pinaagi sa pagpalakat kay Department of Social Welfare and Development Secretary Rex Gatchalian kasubong man ang commitment ni Senator Christoper “Bong” Go.
Apisar nga nagdecamping na sa mga Barangay nga outside 6km danger zone, yara gihapon sa masobra 6,000 ang mga evacuees nga ila kinahanglan pakan-on kada adlaw.
Suno diri, kun sadto ang mga foodpacks ang ginahatag sa kada pamilya, sa karun sila ang nagrequest na sa DSWD kun mahimo nga buksan agud matingob na lamang ang pagluto ilabi na nga sa masami isa lang ang kitchen area sa evacuation site.
Apang ini ang mapakaon lamang sa pamahaw, samtang sa panyaga kag panyapon, sila ang nagapangita na sang iban nga sources.
Abiso sang Phivolcs, nga ipabilin sa evacuation centers ang mga gikan sa 6km danger zone sa sulod sang 21 ka adlaw bangod ginapanilagan pa ang aktibidad sang bulkan, kag nagapabilin ang posibilidad sang pagluntad sang major eruption.
Abiso naman sini sa mga magadonar nga ang tanan ang ipaagi gid sa ila command center bangod ang mga donasyon ang gina-audit sa Commission on Audit kag agud alalangay man ang distribusyon.
Padayun ang pangabay sini sa National Government nga sila ang mabuligan partikular na sa pagpakaon sang mga evacuees, kasubong man ang paghimo sang permanente nga tikang sa kaangay nga mga kalamidad.
