Nagpangayo sang bulig sa national government ang alkalde sang banwa sang La Castellana, Negros Occidental para sa pagpatukod sang mga balay para sa pamilya nga nagikan sa 4km permanent danger zone sang Bulkan Kanlaon kasubong man sa pagpatukod sang evacuation center.
Personal nga nagsulat si La Castellana Mayor Rhummyla Nicor-Mangilimutan kay President Ferdinand “Bongbong Marcos agud magpangayo sang bulig sa national government agud nga magpatindog sang mga balay agud nga mangin evacuation centers sa tion nga maglupok of Bulkan Kanlaon.
Indi man problema ang duta bangud ang LGU ang may yara na sang duta nga patindugan sang evacuation center kag ini ang nahamtang sa Barangay Maghanoy.
Nahibaluan gikan sa alkalde nga may 10 ka pamilya ukon kapin 30 ka mga indibidwal nga nag-evacuate nagikan sa 4km Permanent Danger Zone sang Bulkan Kanlaon nga temporaryo sa karon nga nagapuyo sa covered court sang Barangay Masulog kag ginasuportahan sang banwa paagi sa pagdul-ong sang ila pagkaon.
Samtang, nagdangat na sa ₱194 million pesos ang kahalitan sa agrikultura nga natuga sang pag-alburuto sang Bulkan Kanlaon sa banwa sang La Castellana.
Suno kay Mangilimutan, ini nga datus ang base sa ila nga assessment halin pa sang Hunyo 3, 2024, ang una nga adlaw sang phreatic eruption.
Ginpahayag ni Mangilimutan, ginabanta linibo ka mga mangunguma ang apektado sa amu nga kahalitan.
Suno pa kay Mangilimutan, posible mas dako pa ang kahalitan sang pag alburuto sang Bulkan Kanlaon bangud may mga mangunguma pa sila nga wala nalab-ot ilabi na ang yara sa nabukid na nga porsyon.
Ang mga Barangay nga tuman nga apektado amu ang Brgy. Masulog, Cabagnaan, Biak na Bato, Mansalanao, Sag-ang kag Norte nga bahin sang Barangay Cabacungan, Manghanoy kag Camandag, La Castellana.
