Ginpirmahan naman ni Bacolod City Mayor Evelio “Bing” Leonardia ang Executive Order No. 58 nga nagapatuman sang Home Quarantine Pass (HQP) system kag Border Control agud nga iregulate ang hulag sang mga tawo agud mapahagan-hagan ang local transmission sang COVID-19 epektibo Setyembre 3 tubtob Setyembre 15.
Sa idalom sang EO, ginamando ang istrikto nga home quarantine sa mga miyembro sang vulnerable sectors kaangay sang mga 21-anyos panubo; 60-anyos pasaka; may mga immunodeficiencies, comorbidities kag iban pa nga mga balatian kag mga nagabusong.
Exempted naman sa HQP ang mga government officials, medical kag non-medical frontliners; mga private sector employees kun sa diin ang opisina ukon negosyo ang ginatugutan nga mag-operate sa idalom sang general community quarantine, miyembro sang vulnerable sectors nga isahanon nga nagapangabuhi kag kinahanglan nga magbakal sang pagkaon ukon bulong kag mga nagakinahanglan sang atensyon medikal.
Kinahanglan lamang nga ipakita ang company ID kun maggwa sa puluy-an ang mga nalakip sa exemptions sa HQP policy.
Isa ka HQP ang ihatag sa kada panimalay apang pwede ini magamit sang tatlo ka mga miyembro sang pamilya pero indi dapat dululungan nga maggwa.
Ipatuman naman ang odd-even scheme sa mga HQP kun sa diin ang mga HQP holders nga may HQP nga nagatapos sa odd numbers ukon 1, 3, 5, 7 kag 9 ang pwede makagwa kun M-W-F ukon Lunes, Miyerkules kag Biyernes.
Samtang, ang mga HQP holders naman nga may HQP nga nagatapos sa even numbers ukon 2, 4, 6, 8 kag 0 ang pwede makagwa kun T-TH-S ukon Martes, Huwebes kag Sabado.
Wala naman sang may makagwa kun Domingo nga adlaw.
Sa mga residente naman sang Bacolod nga may trabaho sa sagwa sang ciudad, ipakita lamang ang company ID.
Kinahanglan man magpakita sang nagakaigo nga dokumento ang mga out-of-town residents kun may essential business sa ciudad.
Kinahanglan man nga ipakita ang HQP sa mga mall kag iban pa nga mga commercial establishments.
Ang city government naman ang maga-print sang HQP kag iga-distribute sang kada barangay.
