Nagpasalig ang alkalde sa banwa sang Valladolid sa pagbulig sa mga nabilin nga kabataan kasunod sang pagluthang patay sang pulis sa iya kahagugma kag pag-utas sang kaugalingon nga kabuhi sa Purok Camia, Barangay Poblacion, Valladolid kagab-i.
Sa interview sang Bombo Radyo Bacolod kay Valladolid Mayor Enrique “Bebot” Miravalles, nagapadayun ang negosasyon sang mga kapulisan kay Police Master Sgt Larry Junio sang iya maabtan.
Apang natiruhan na sini sang pila ka beses ang iya kahagugma nga si Maicah Redil, apang ini ang mabatian pa nga nagapangayo sang bulig.
Ang negosasyon ang naglawig pa sang masobra isa ka oras tubtob nga wala na nagasabat si Junio.
Nagpangayo na ang mga kapulisan sang clearance nga sudlon ang balay, nga gilayon man nga ginsugtan sang alkalde.
Nag-upod man si Mayor Miravalles sa pagsulod sa balay, kag ginpahayag sini nga nakaangkon sang kabudlayan ang kapulisan nga mabuksan ang piyertahan bangod sa nagabalabag nga tiil sang pulis.
Apang sa paglantaw sini, wala na sang kabuhi si Junio.
Aminado naman si Miravalles nga may pulso pa si Redil sang sila ang makasulod, apang gindeklarar nga dead in arrival sang gindala sa Valladolid District Hospital.
Suno diri, patal ang pilas sang babayi bangod magluwas sa madamo nga igo sang bala sa lawas, ini ang may igo man sa ulo.
Pahayag sang alkalde nga nakilala na sini si Junio bangod ini ang anay na-assign man sa Valladolid Municipal Police Station.
Suno diri, mabuot man ang pagkakilala sini sa pulis, kag haluson maghambal.
Si Junio ang nagpangatubang sang administrative case kag nasuspender, kag sang siya ang makabalik ini ang gin-assign sa Iloilo City Police Station 5 sa Mandurriao, Iloilo City.
Pasalig ni Miravalles nga magahatag sang bulig ang Municipal Government paagi sa Department of Social Welfare and Development kag iban pa nga sarang mabulig bangod ini ang ila obligasyon.
