Ginapasundayag sang alkalde sa Valladolid Negros Occidental ang selebrasyon sang Pasundayag Festival kun sa diin ang highlight ang natalana sa Pebrero 28.
Sa interview sang Bombo Radyo Bacolod kay Valladolid Mayor Enrique Miravalles, ginapreparahan na nila ang ila nga pre-fiesta activities nga naga-umpisa subong nga adlaw sa pagpatigayon sang mga martial arts competitions.
Samtang patigayunon man sa masunod nga semana ang dragon team kag national-invitational motocross nga partisiparan sang tanan nga national rider sa bilog nga Pilipinas nga nagahampang abroad nga natalana sa Pebrero 26 tubtob 27.
Sa highlight, Pebrero 28, sila ang may-ara sang patigayunon nga Paraw Regatta sa baybayon sang Barangay Palaka, Valladolid.
Yara man ini sa karun sa Manila kag tuyo sang alkalde nga maka-imbetar sang mga National officials nga mahimo makatambong sa kapiestahan.
Apang, ginapaabot naman sini nga indi makahingagaw sa kapiestahan kag sa Marso pa magaduging ang diwal sa nasambit nga banwa.// Ginalauman naman sang alkalde nga ang pagduging sang diwal ang doble sangsa volume sang nakaligad nga tuig.
Apang liwat pa ang mga ini magapatigayon sang testing sa ulihi nga semana sang Pebrero agud matumod kun nagakaigo na ang sizes sang mga diwal kag sarang na nga maharvest agud ipakaon sa mga bisita sa Pasundayag Festival.
Sa Pebrero 23, may-ara man sang job fair ang banwa sang Valladolid, nga sarang partisiparan bisan sang mga indi residente sa banwa.
Paathag ni Mayor Miravalles nga normal na nga masidyahon ang plaza sa Valladolid bangod sa mga basketball games, apang humalin sang nakaligad nga tatlo ka semana, sila ang nagbutang naman sang mga carnivals.
Ginahalad naman sang mga ini ang selebrasyon para sa ila nga patron, ang Nuestra Seniora de Guadalupe.
Sa karun gikan sa 16 ka mga barangay, sila ang nagpatigayon sang clustering kun sa diin apat lamang ka tribo ang magacompete.
Samtang ang tema sang Pasundayag Festival amo ang “Ugyon Dolidnon ang pag-inupdanay kag asenso ipadayon”.
Ginapanugyan sang alkalde nga saksihan ang mga programa nga madinu-agon kasubong man ang harmoniya nga nagapatunga sa banwa sang Valladolid sa selebrasyon sang Pasundayag Festival 2023.
