Nagpanugyan ang alkalde sang syudad sang Bacolod nga mas mapahapos ang paghatag sang fuel subsidy kag iban pa nga mga ayuda gikan sa National Government kun ipaagi sa local government unit (LGU).
Matapos ang pagpatigayon sang People’s Holiday ukon Untat Byahe sang transport sector partikular na sang mga jeepney drivers sa syudad sang Bacolod, nag-atubang naman sa mga pumuluyo kahapon si Bacolod City Mayor Evelio “Bing” Leorandia kaupod sa committee on transportation sa Bacolod City Council agud mapatpat ang mga programa kag bulig para sa sektor nga apektado sa karun sang tuman nga pagsaka sang presyo sang gatong.
Pahayag sang alkalde nga sa telephone conference nila kahapon upod sa Regional Director sang Land Transportation Franchising and Regulatory Board (LTFRB) Region 6, ila nadiskusyunan ang nahanungod sa ginalauman na nga subsidy para sa mga drivers sang pampubliko nga transportasyon.
Nagapati ini nga ang City Government ang may-ikasarang sa pagtrabaho upod sa Department of Transportation (DOTr).
Ginakalipay sini nga gilayon man nga nagsugot ang ahensya.
Pasalig ni Leonardia nga may mekanismo na nga nahuman ang City Government, samtang magluwas sa ayuda para sa mga Jeepney Drivers, ginapaabot man nga makabaton sang fuel subsidy ang mga tricycle driver sa idalum sang Department of the Interior and Local Government (DILG).
Suno sa alkalde, nag-ugyon man sa set-up si Councilor Dindo Ramos agud nga mas mapadasig ang paghatag sa tion nga mag-abot na ang ayuda.
Samtang nagalaom naman si Leonardia nga maathag sa mga transport group nga ginhatagan ang mga ini sang ligwa agud mapa-utwas ang ila nga mga sentimyento.
Pahanumdom sang alkalde nga ang isyu nahanungod sa pagtaas sang presyo sang gatong ang indi lokal kundi worldwide.
Ginlahugan pa sini nga kuntani may bisan isa sa mga ini nga makasugilanon kay Russian President Vladimir Putin nga untaton na ang gyera sa Ukraine agud mag-untat naman ang pagsaka sa presyo sang gatong.
Sa pihak nga bahin, ginpasalamat naman sini nga nangin malinong kag matawhay ang pagpatigayon sang Transport Strike.
Ginpasalamatan man sini ang tanan nga nagbulig lakip na ang mga kapulisan kag Bacolod Traffic Authority Office (BTAO) kasubong man sa mga nag-upod sa strike nga napatigayon ini nga may kaayusan. Samtang, ginpahayag sang chairman sang Committee on Transportation sa Bacolod City Council nga ipaagi sini sa asosasyon ang paghatag sang mga ayuda nga natalana sa mga drivers bangod ang mga ini ang nakakilala sang ila nga mga miyembro.
Pahayag ni Councilor Dindo Ramos nga ang distribusyon sang fuel subsidy sang National Government ang dapat nga sa local government unit (LGU) ipaagi agud nga malikawan ang duplication.
Suno sa konsehal, ang Bacolod City Government ang una na nga nakahatag sang bulig pinansyal sa mga drivers.
Kun sa diin nagadangat sa 500 tubtob 700 ang nangin benepisyaryo sang balor P2,000 nga ayuda.
Ini ang sa idalum sang ginduso nga “Assistance to Individual in Crisis Situation (AICS)” program maykaangatanan sa COVID-19 situation sang syudad, apang bangod sa krisis sa pagsaka sang presyo sang gatong ginduso man nga ini ang magamit sa paghatag sang ayuda sa mga apektado nga driver.
Bangod sini, ginalantaw ni Ramos nga kun indi ang LGU ang magapatigayon sang distribusyon sang ayudad sang National Government, mahimo man nga mahatag ini sa mga nahatagan na samtang may-ara naman sang indi makabatun.
Dugang pa sang konsehal nga yara na sa local government code nga sa implementasyon sang programa sang National Government, kinahanglan man nga imbulbado ang LGU kun sa diin ini ipatuman.
Ginapakamaayo naman ni Ramos nga may commitment na si Land Transportation Franchising and Regulatory Board (LTFRB) Region 6 Director Richard Osmenia kay Bacolod City Mayor Evelio “Bing” Leonardia, gani ginalauman nalang sini nga mapatigayon ang programa subong ukon sa masunod nga bulan.
Pasalig ni Ramos nga ang LGU ang magapanagtag sa Jeepney Driver, ang Department of the Interior and Local Government (DILG) naman ang para sa mga tricycle drivers, samtang indi pa sini segurado kun kabahin ang taxi drivers kag kun paano ang distribusyon sa mga ini.
Ginalantaw man sini nga makabahin sa pagahatagan sang ayuda ang mga delivery riders.
