Ginpaathag sang alkalde sa ciudad sang Bacolod nga ang pagpatuman sa kada Dominggo ang indi matawag nga lockdown kundi Restricted Movement lang.
Suno kay Bacolod City Mayor Evelio “Bing” Leonardia ang ciudad ang may 153,000 nga kabug-usan nga pamilya santo sa record sang City Planning Development Office (CPDO).
Apang gina-estimate naman ni Leonardia nga sarang pa ini nga magdangat sa 160,000 bangod sa madamu sang pamilya ang ululupod sa isa ka panimalay.
Pahayag sini nga kun pagahatagan sang isa ka home quarantine pass (HQP) ang kada panimalay, sarang gihapon magdangat sa 160,000 ang makagwa kag makalibot sa ciudad.
Suno kay Leonardia, sa pagsugilanun sini kay Silay City Mayor Mark Golez ginpahayag ni Golez nga 120,000 ang kabug-usan nga populasyon sa ciudad nga nasakupan sini apang kun ikumparar, ang 150,000 tubtob 150,000 ang numero palang sang pamilya sa Bacolod.
Ini ang rasun kun ngaa ginduso sang alkalde ang pagpatuman sang odd-even scheme sa mga HQP.
Ang mga odd numbers kaangay sang 1, 3, 5, 7 kag 9 ang sarang lang nga makagwa sa adlaw nga Lunes, Miyerkules kag Biyernes samtang ang mga even numbers naman kaangay sang 0, 2, 4, 6 kag 8 ang sarang nga makagwa sa adlaw sang Martes, Huwebes kag Sabado.
Samtang santo sa Executive Order no. 59 section 4 nakasaad naman nga indi ma-usar ang mga HQP sa adlaw sang Dominggo.
Paathag sini nga indi pwede makagwa ang mga HQP dependent apang mapahanugutan naman sa paggwa ang mga frontliners, media, government employees, mga naga trabaho, mga driver sang pampubliko nga salakyan kag iban pa nga exempted sa layi.
Paathag ni Leonardia nga daku ang kinatuhay sa pagpatuman karun kun ikumpara sa ginpatuman sadtong Abril kag Mayo samtang yara sa enhanced community quarantine (ECQ) ang ciudad.
Suno kay Leonardia, sa ECQ ginapasarado ang mga baligyaan sa malls kag mga negosyo apang sa karun magapabilin ini nga bukas.
Maga implementar sang HQP apang madamo sang exemption.
Ang mga nagatrabaho kag negosyante ang sarang lang nga makagwa apisar nga wala sang HQP kinahanglan lang nga ipakita ang valid ID ukon authorization letter.
Kasubong man nga ginapahanugutan ang mga pampubliko nga transportasyon.
Ginalimitahan lamang sang ciudad nga tuman ka damo ang magagwa nga mga pumuluyo.
