Ginkumpirmar ni Bacolod City Vice Mayor El Cid Familiaran nga may yara sang joint agreement nga ipagwa sanday Mayor Evelio “Bing” Leonardia kag Iloilo City Mayor Jerry Treñas angot sa pagsulundan sa pagbalik sang commercial sea travel.
Sa interview sang Bombo Radyo Bacolod kay Familiaran, ginpahayag sini nga padayon pa ang ila nga sinapol agud hambalan ang mga protocols nga ila luyag ipatuman.
Suno diri, ang tanan nga ila mahisugtan ang ipresentar ni Leonardia sa Iloilo City government agud nga makadihon man ang duha ka mga local government units sang joint agreement angot sa pagbalik sang biyahe sang mga fastcraft nga nagalayag Bacolod-Iloilo vice versa.
Dugang pa sang bise alkalde nga sapulon liwat sang city officials ang mga shipping lines agud nga ipaathag ang guidelines.
Gin-athag man sini nga padayon pa ang ila nga diskusyon kun iswab test pa ang mga pasahero nga magaabot sa Bacolod bangud nahibaluan nga nakasaad sa Executive Order No. 20-26 series of 2020 ni Negros Occidental Gov. Euegenio Jose “Bong” Lacson nga dapat ipaidalom gid sa RT-PCR testing ang mga pasahero nagikan sa Iloilo.
Samtang, ginklaro man ni Familiaran nga ang wala man sang dako nga pagbag-o ang ginpagwa nga Executive Order No. 43 ni Leonardia nga naga-extend sang modified general community quarantine (MGCQ) sa ciudad sang Bacolod halin Hunyo 16 tubtob Hunyo 30 magluwas lamang sa mga 21-anyos panubo kag 60-anyos pasaka bangud pwede na sila karon makagwa sa ila mga balay.
Apang, suno diri, gina-engganyo man sa gihapon sang city government nga kun wala man lang sang importante nga kadtuan, magtinir nalang sa panimalay agud malikawan nga malatnan sang coronavirus.
