Ginpahayag sang alkalde sang ciudad sang Bacolod nga isa ang ciudad sa mga aktibo nga nagahimo sang tikang agud nga mapatuman ang jeepney modernization program.
Suno kay Bacolod City Mayor Alfredo “Albee”Benitez, ang deadline ang ginahatag lamang agud nga mapatuman ang transition period sa Public Utility Modernization Program.
Suno kay Benitez, antes pa man ang tanan, kinahanglan anay sang mga stakeholders ukon ang modernize jeepney operators kasubong man ang traditional jeepney operators nga batunon ang nasambit nga bag-o nga programa kag sa tion nga mabaton na nila, magatalana ang ciudad sang timetable kun san-o ipatuman ang bag-o nga programa.
Suno sa alkalde kun makita sang Department of Transportation nga ang ciudad ang nagahimo sang tikang para mag-upod sa modernization, mahimo nga paboran man sang ahensya ang tikang nga ginahimo sang ciudad.
Sa karun may yara na sang kapin 600 ka units sang modernize jeepney nga nagabiyahe sa ciudad.
Ginpahayag man sang alkalde nga ang kapin 3,000 nga mga traditional jeepneys ang indi man tanan legal nga nagabiyahe sa ciudad gani ginalantaw nga paagi sa Public Utility Modernization Program ang legal lamang nga jeep ang makabiyahe sa palibot sang ciudad.
Samtang ginpahayag man sang alkalde nga wala man sang negatibo nga reaksyon ang DOTr sa proposal sang alkalde nga magatukod sang kooperatiba ang ciudad kag maassociate nalang ang mga tradition jeepney operators agud nga makaupod na sa modernization program sang mga jeep.
Gani dako ang pagsalig sang alkalde nga makacomply gid ang ciudad sa requirements sang Public Utility Modernization Program.
