Makighinun-anon si Mayor Alfredo Benitez sa mga vendors tuhoy sa mga basura sa Central Market nga iya nakit-an sang ini ang naglibot sa ciudad sang tinalikdan nga gab-i.
Suno kay Benitez, makighinun-anon ini sa mga vendors agud magpanugyan nga dapat tinluan ang ila mga ugsaran kag indi lamang ini pag-isalig sa mga garbage collectors kag street cleaners.
Suno sa iya, nakit-an sini nga ginahaboy lamang ang mga basura maskin diin gani dapat may yara sang sistema agud icluster ang area kun diin ini dapat nga ihaboy.
Nakighinun-anon naman ang alkalde sa IPM Construction and Development Corporation kag tubtob pa sa Disyembre ang kontrata sini a ciudad.
Sa karun nagapangita sila sang pamaagi agud mabuhin-buhinan ang basura bangud 33 tons lamang ang nalakip sa kontrata sang ciudad sang IPM apang yara sa 59 tons sa karun ang basura sa Bacolod.
Suno sa iya, dapat nga magsegregate kag magrecycle samtang sa mga higko nagikan sa merkado, mas maayo nga ideretso na lamang ini sa composting facility agud mahimo nga fertilizer kag makabulig pa sa mga mangunguma.
