Nag-abiso si Bacolod City Mayor Alfredo ‘Albee’ Benitez sa mga Elementary Public School Teachers nga indi gid pag-ipressure ang mga ginikanan sang estudyante sa pagbakal sang madamo nga school supplies.
Ini matapos nga wala sa gihapon makapanagtag ang Bacolod City Government sang libre nga school supplies para sa Grade 1 tubtob Grade 6.
Sa interview sang Bombo Radyo Bacolod kay Atty. Caesar Distrito, spokesperson sang alkalde, nasuguran na ang procurement process kag sa tion nga may-ara na sang purchase order kag may magdaog nga bidder gilayon man nga ipanagtag ang mga school supplies.
Panugyan sini nga bisan isa lamang ka notebook anay ang baklon sang ginikanan agud indi magdoble ang mga school supplies kag indi magastuhan ang mga ginikanan.
Ginapaabot sini nga 10 ka notebook, papel, lapis, ballpen, ruler kag art materials ang kabahin sa ipanagtag sang Bacolod City Government.
Paathag ni Distrito, nga amo ang nagduso sang ordinansa sang ini ang konsehal pa, nga ang tinutuyo sini amo nga mabuligan partikular na ang mga ginikanan nga may masobra isa ka Elementary student.
Ginalantaw sini nga madeliver ang mga school supplies sa Agosto.
Ang programa ang may budget nga P30 million.
Madumduman nga wala nakapanagtag sang school supplies sang tinalikdan nga tuig bangod kulang ang P15 million nga budget ilabi na nga tuman ka mahal ang mga school supplies.
