Nagahingyo sang kooperasyon sa mga pumuluyo ang alkalde sang Bacolod City nahanungod sa mga stringent measures nga ginapatuman sa ciudad.
Madumduman nga kahapon nga adlaw ginpatuman ang Executive Order No. 52 ukon ang pagpalawig sang curfew hours sa alas-8:00 sang gab-i tubtob alas-4:00 sang kaagahun kag magatakop sa Agosto 22.
Sa statement nga ginpagwa ni Mayor Evelio “Bing” Leonardia, nagahingyo ini sang kooperasyon kag suporta sang mga pumuluyo sa mga measures nga ginapatuman sa ciudad kaangay sang non-social hours, liquor ban, pagdumili sa mga naga-edad 20 anyos padalum kag 60 anyos pataas sa pagwa kag pagpasirado sang merkado sa ciudad kun Dominggo para sa disinfection.
Suno kay Leonardia, ang nasambit nga mga measures ang ginapatuman agud maminimize ang paglapta sa virus ilabi na nga nagadamo ang local transmission sa ciudad.
Gani nagaapelar ini sang suporta kag kooperasyon sang mga pumuluyo bangud suno sa alkalde, responsibilidad sang tanan ang pagpugong sa paglapta sang balatian.
