Nagapangayo sang pasaylo si Bacolod City Mayor Evelio “Bing” Leonardia nahanungod sa ginapanagtag nga foodpacks nga ginaalegar expired ukon may deperensya.
Ini ang kasunod sang reklamo sang mga pumuluyo nga expired ang noodles kag may baho ang bugas gani indi matig-ang.
Sa interview sang Bombo Radyo kay Leonardia, ginpahayag sini nga iya pa ginaverify kun matuod-tuod ang mga impormasyon nga nagagwa sa social media tuhoy sa alegasyon sa mga foodpacks kag ginapausisa pa kun sin-o ang may kaangtanan sa mga ini.
Suno diri, may yara na siya sang lista kun diin nga mga barangay ang posible nga mga suspetsado sa indi maayo nga kalidad sang mga foodpacks nga ginapanagtag kag luyag man niya ang mga ini nga makaatubang kaupod ang Department of Social Services and Development (DSSD).
Suno sa iya, indi lang kuntani pagpatam-an ang mga nagpreparar ukon nagpanagtag sang mga ini bangud sa 38 mil ka mga pumuluyo nga ginhatagan, normal lang kun may napulo tubtob 100 nga may deperensya.
Posible, suno sa alkalde nga may iban nga bahin sang mga bugas nga naglain ang color bangud nabasa ini sang ulan sang ginbutang sa gym sang eskwelahan.
Gin-athag man sini nga nagikan sa National Food Authority ang mga bugas kag ginpahayag sang NFA nga indi ang mga ini maghatag ukon magbaligya sang bugas nga indi pwede makaon.
Nahanungod naman sa mga expired nga noodles suno kay Leonardia, bulan sang Hulyo pa ang mga ini ginbakal agud ipanagtag kuntani sa mga pumuluyo apang bangud nakabaton man ang kalabanan sang Social Amelioration Program (SAP) cash assistance, wala nalang ini ginpanagtag kag ginpain sa tion nga kinahanglanon.
Naintindihan man sini nga may mga reklamo nga may yara sang mga noodles nga nag-expire sang Setyembre 11 apang sa kaangay nga adlaw man ginpanagtag gani kun matuod gid man ini, ireport lang sa DSSD.
Bangud diri suno sa iya, islan na lang ang mga noodles sang canned goods.
Suno sa alkalde, sa karun yara na sa 5,000 ka mga persona ang naserbehan sang foodpacks sa mga quarantine kag isolation facilities.
Nagpangayo man sang pasaylo si DSSD Head Pacita Tero sa indi maayo nga kalidad sang mga foodpacks kag nagpangabay nga kun may yara sang kaangay nga eksperyensya, mas maayo kun ipadangat ini sa barangay agud mahimuan sang tikang agud ma-address ang concern.
