Nagpasalig si Bacolod City Mayor Alfredo ‘Albee’ Benitez nga magabulig ini sa mga biktima sang natumba nga bus nga ginapanag-iyahan sang Bacolod City government sa Purok Talos, Barangay Igmaya-an, Salvador Benedicto, sang Biyernes.
Sa interview sang Bombo Radyo Bacolod kay Punong Barangay Atty. Caesar Distrito sang Barangay Sincang-Airport kag spokesperson sang alkalde, naghatag sang bulig ang Bacolod City Government sang bulig sa mga biktima sa ila nga nagasto sa pagpa-ospital paagi sa Bacolod Comprehensive Health Program (BacCHP).
Nagpasalig man ang alkalde nga hatagan sang bulig ang pamilya sang napatay nga manunudlo nga si Arlyn Tolosa Verde.
Nagapakig-angot man ang alkalde sa Department of Social-Services & Development (DSSD) kag City Administrator kun ano ang kinahanglan kag mahatag pa nga bulig sang ciudad sa mga biktima.
Maga-designar man ang ciudad sang imbestigador sa natabo nga aksidente para mahibaluan kun ano ang nangin problema sang salakyan ukon may yara sang liability ang mga personnel.
