Ginakalipay sang alkalde sang Bacolod nga recovering na ang labing una nga pasyente sang coronavirus disease sa ciudad sang Bacolod.// Sa press conference nga ginpatigayon ni Mayor Evelio “Bing” Leonardia kahapon, sige-sige na ang pag-ayo sang 56-anyos nga male patient nga may travel history sa London.
Suno diri, ang team halin sa City Health Office ang nagatrabaho kaupod ang mga katapo sang PNP para magpatigayon sang manhunt para matrack ang nakaupod sang pasyente sang tinalikdan nga mga semana.
Ang mga nakaupod sang pasyente ang ginakonsiderar nga Persons Under Monitoring(PUM).
Suno pa sa mayor, indi pag-ipagwa sa publiko ang mga pangalan sang mga PUM apang ginasiguro nga hatagan sila sang nagakaigo nga instruction kag advises.
Magapatigayon man sang pagdisinfect sa mga lugar nga nakadtuan sang pasyente.
Ginalauman man sang city government ang pagkahuman sang pasilidad nga magaserbe bilang Research Institute for Tropical Medicine(RITM) sa Western Visayas.
Ginalantaw nga posible nga mahuman ang amo nga pasilidad sa masunod nga semana.
Suno kay Leonardia, matestingan naman sang ciudad kun ano sa mga test kit nga gin-anunsyo sang FDA ang sarang nga mabasa sang RITM.
Nagahulat nalang sang paghanugot halin sa DOH ang siyudad, kag nakahanda na ini nga magbakal sang una nga tatlo ka libo (3000) nga mga test kit nga magabalor 5million pesos.
Samtang wala pa ang amo nga pasilidad, ang SWAB sample ang ipadala sa Manila para sa test.
