Ginakalipay sang alkalde sa syudad sang Bacolod nga gikan sa Alert Level 4 panubuan na sa Alert Level 2 ang status sang syudad sa COVID-19 sumugod subong nga adlaw Nobyembre 15 tubtob 30, 2021.
Suno kay Bacolod City Mayor Evelio “Bing” Leonardia, nabatun sini sang Sabado ang impormasyon gikan mismo sa National Inter-Agency Task Force (NIATF).
Pahayag sini nga tuman ka taas ang Alert Level 4 nga status sa Bacolod bangod nakita naman nga nagnubo na ang kaso sang COVID-19.
Bangod sini, ginligwat na ang Alert Level sang syudad kun sa diin palarehas na ang tanan nga local government unit sa Western Visayas nga ginpaidalum sa Alert Level 2, kalakip na ang Negros Oriental.
Pahayag ni Mayor Leonardia nga bangod sa pagnubo sang status, mas mangin maligwa naman ang mga pagpatuman kun ipanggid sa nakaligad.
Suno pa diri, magasugilanon sila nga mga opsiyal sang syudad kun ano ang mga pagsulundan ilabi na nga aminado man ang mga ini nga nagasaka-panaog ang kaso sang COVID-19.
Dugang pa sini nga ginahandum sang tanan nga makabalik na sa normal ang sitwasyon gani ginapanugyan sang alkalde ang kooperasyon sang tanan nga pumuluyo.
Pasalig naman sini nga iga-intensify pa sang syudad sang Bacolod ang vaccination campaign.
Bisan pa ang Regional Director sang Department of Health Region 6 suno kay Leonardia ang nagapahayag nga dako nga factor sa pagnubo sang COVID-19 cases amo ang pagtaas sang porsyento sang mga nabakunahan.
Natalana naman nga magpagwa sang Executive Order (EO) ang alkalde natuhoy sa panibag-o nga mga pagsulondan sa pagnubo sang Alert Level Status subong nga adlaw.
