Wala pa sang may nabaton nga formal complaint ang opisina ni Bacolod City Mayor Alfredo ‘Albee’ Benitez halin sa Office of the Ombudsman angot sa nagalapta nga balita nga may ginpasaka nga criminal kag administrative complaints batok sa alkalde.
Sa interview sang Bombo Radyo Bacolod kay Atty Caesar Distrito, spokesperson sang alkalde, may nagalapta nga picture sa social media sang dokumento nga may kaso nga ginfile batok kay Benitez kag sa mga miyembro sang Sangguniang Panlungsod.
Ginreklamo ang pagbakal sang duta sang ciudad kun sa diin ang propedad ang napaidalum sa Comprehensive Agrarian Reform Program (CARP) sang Department of Agrarian Reform (DAR).
Gin-athag ni Distrito nga lain nga duta ang ginareklamo sangsa duta nga ginbakal sang ciudad nga gamiton para sa developmental project kag housing kag tanan nag-agi sa insakto nga proseso kag santo sa layi.
Pahayag ni Distrito, pagpangguba lang ini kay Benitez bangod nagahilapit na ang eleksyon.
Dugang pa sini, madamo man sadto sang ginreklamo nga alkalde apang gindismiss sang Office of the Ombudsman.
Nabutang sa dokumento nga ang complainant amo si Roger Ledesma, residente sang ciudad sang Bacolod samtang ang ginreklamo naman amo si Mayor Benitez kag Councilors Al Victor Espino, Jude Thaddeus Sayson, Israel Salanga, Cindy Rojas, Em Ang, Vladimir Gonzales, Simplicia Distrito, Celia Flor, Psyche Marie Sy, Jason Villarosa kag ABC President Lady Gles Gonzales Pallen kag SK President Ayesha Joy Villaflor.
