Gindula sang alkalde sang ciudad sang Cadiz ang kahangawa sang mga residente kasunod sang pagpositibo sa COVID sang isa ka repatriated nga Cadiznon.
Sa interview sang Bombo Radyo kay Mayor Salvador “Bading” Escalante, wala nakatapak sa ciudad si Patient No. 12 nga nagikan sa Saudi Arabia kag may provincial address nga Cadiz City.
Ginpahayag sini nga sang nag-abot ang Overseas Filipino Worker (OFW) repatriate sa probinsya, ginderecho ini sa isa ka hotel sa ciudad sang Bacolod kag ginkuhaan sang swab kag sang nagwa ang resulta sini nga positibo, gindala man ini sa provincial healing center sa EB Magalona agud ma-isolate.
Suno kay Escalante, nagapabilin nga asymptomatic ang OFW.
Nagpanugyan man ang alkalde sa mga pumuluyo nga indi magkabalaka bangud wala nakapalapit ang pasyente sa Cadiz.
Suno diri, pasalamat na lamang nga ini nga sa Pilipinas nagpositibo kag indi sa Saudi Arabia bangud kun natabo, nabudlayan gid ang pasyente bangud wala sang may matipan diri.
Nagpangabay man ini nga ipabilin nga maayo ang ikaayong lawas bangud malayo matapikan sang balatian kun mabaskog ang immune system.
Ginpahayag man sini nga asset sang syudad ang pasyente bangud nakadevelop na ini sang antibodies kag mahimo na ini nga makadonate sang dugo para sang convalescent plasma transfusion sa tion nga kinahanglanon.
Si Western Visayas Patient 127 ang isa ka 31 anyos nga lalaki nga residente sang Cadiz City. Ginkuhaan ini sang swab sample sadtong Hunyo 1, 2020 kag nag-abot ang resulta kahapon sang aga.
Samtang, ginpahayag man sini nga may yara man sang nag-occupy nga 250 ka OFWs sa quarantine facility sa ciudad kag lunsay nagnegatibo ang swab test result.
Ginpapauli lamang ang mga ini agud tapuson ang mandatory quarantine.
