BACOLOD CITY-Ginpanginwala sang alkalde sang banwa sang Calatrava ang alegasyon nga may kaangtanan siya sa Mancao Group nga gina-alegar naengkwentro sang kapulisan, Byernes sang gab-i kun sa diin tatlo ang napatay.
Suno kay Mayor Araceli Somosa, wala siya nakakila ukon nakakita sa nasambit nga grupo nga gina-alegar nagapatigayon sang extortion gamit ang iya ngalan.
Suno pa diri, posible nga ginapulitika lamang siya sang iya mga kontra.
Naakig ang alkalde nga naangot ang iya ngalan sa nasambit nga grupo nga ginapahayag ginapamunuan ni Sabino “Cadong” Mancao nga isa sa mga napatay kag anay miembro sang New People’s Army (NPA).
Madumduman nga patay man sa insidente sanday Ramil Castor kag Emar Himang samtang tatlo ang nakapalagyo kag tatlo man ang arestado.
Ginkilala ang mga naaresto nga sanday Romnick Octavio, 28-anyos kag Pepe Lausa, 51-anyos lunsay residente sang Brgy. Cambayobo, kag Josie Castor, 42-anyos sang Brgy. Bug-ang, Toboso nga live-in partner ni Mancao.
Nakuha naman sa posisyon sang tatlo ka mga arestado ang duha ka homemade caliber 45 pistol nga may 5 live ammunitions kag isa ka homemade caliber 38 revolver nga may 5 live ammunitions.
Samtang nakuha naman sa ginluntaran sang engkwentro ang KG-9 machine gun, 12 gauge shotgun, homemade snub 38 caliber revolver kag nagkalain-lain nga cartridges.
