Nagpangayo sang pasaylo ang alkalde sang banwa sang Cauayan tuhoy sa isa ka empleyado sang Cauayan Municipal Health Office nga nagdiskriminar sa mga taga-Bacolod sang nag-inquire ang isa ka residente sang banwa nga nagaubra sa Bacolod City kun sa diin sarang nga makakuha sang passes.
Sa screenshot sang chat conversation nga ginpost sang nasambit nga residente, nag-inquire ini kun diin sarang makakuha sang pass bangud nagaubra ini sa Bacolod apang nagapauli isa ukon duha ka beses kada bulan sa Cauayan bangud yara didto ang iya mga kabataan.
Ginsabat ini sang admin sang nasambit nga page nga siya ang nagabitbit sang kagaw nagikan sa Bacolod nga sa karun hotspot sang COVID rasun kun ngaa ginpaidalum sa MECQ.
Daw kaangay nga gin-akigan man sini ang residente bangud nagabalik-balik ini sa ciudad.
Nakaangkon sang madamo nga negatibo nga reaksyon kag komento ang screenshot kag madamo nga mga netizens ang nagpahayag nga tuman ka unprofessional ang nasambit nga empleyado.
Sa interview sang Bombo Radyo kay Mayor John Rey Tabujara, nagpangayo ini sang pasaylo sa mga taga-Bacolod bilang alkalde bangud sa nasambit nga frontliner sang Municipal Health Office.
Suno kay Tabujara, bisan siya ang nagapati nga indi insakto kag wala sang respetasyon ang pagsabat sang empleyado ilabi na nga residente man sang banwa ang iya gina-istorya.
Suno sa iya, siya mismo ang nahuya bilang alkalde sa pamaagi sang pagsabat sini gani magadihon ini sang sanction kun ano ang sarang nga mahimo.
Nagpang-abiso man ini sa mga opisyales nga kun may mag-inquire tuhoy sa mga restrictions sa banwa, itudlo ini sa Information Office para consistent ang sabat.
Gindugang man ni Tabujara nga kinahanglan mangin professional kag courteous gid sa pagsabat sa mga nagapamangkot bangud indi makabig nga valid nga rason ang kakapoy sa indi maayo nga pamatasan.
Suno diri, naistorya namn sini ang pamilya sang tagreklamo kag kun iya na matumod ang empleyado sang MHO, ipatawag niya ini kag ipataubang sa nasambit nga pamilya.
Nagapangayo ang alkalde sang pasaylo ilabi na sa mga taga Bacolod kag nagpasalig nga indi na ini matabo pa liwat.
