Magapamati ang alkalde sang ciudad sang Bacolod sa presentation sang More Power nga mangin kaupod sang Central Negros Electric Cooperative sa joint venture agreement kun matigayon.
Suno kay Bacolod City Mayor Alfredo Benitez, suportahan niya ang joint venture agreement kun mapanubo ang rate sang kuryente, madula ang brownout kag green ang source sang kuryente, apang kinahanglan pa niya nga maassess ang background sini.
Apang may scheduled naman nga presentation ang More Power sa alkalde kag mga miyembro sang Sangguniang Panlungsod sa masunod nga semana ukon pagkatapos sang Holy Week.
Suno kay Benitez, mahimo nga mag-imbitar sang publiko nga magtambong sa detailed presentation.
Ginpanindugan sang alkalde nga kinahanglan nga magmove forward ilabi na kun may makita nga problema nga kinahanglan solbaron kaangay sang reklamo sa mahal nga kuryente kag brownout.
Suno diri, kinahanglan iassess ang track record sang proponent sang joint venture agreement.
Base naman sa diskusyon ni Benitez kay Iloilo City Mayor Jerry Trenas, malipayon sila sa serbisyo sang More Power. Samtang, una nga ginkumpirmar sang general manager sang Central Negros Electric Cooperative nga nabaton na sini ang sabat sang National Electrification Administration (NEA) sa ila ginpadala nga sulat sa ginpropose nga joint venture sang MERALCO kag More Power.
Sa interview sang Bombo Radyo Bacolod kay Atty. Arnel Lapore, natalana nila nga imbitaron sang CENECO ang duha ka kompaniya agud nga mapatpat ang kaundan sang Joint Venture Agreement (JVA) agud man nga maathagan ang board members kag sila man ang makapatigayon sang paghinun-anon sa mga empleyado.
Suno kay Lapore, nagpanugyan man ang NEA nga magkuha sang isa ka highly professional nga amo ang magatuon kag magalantaw sang proposal sang duha ka kompaniya.
Natalana ang pagsinapol sa Abril 13.
Ginpasiguro man sini nga mangin kabahin ang publiko sa patigayunon nga JVA
Sa pihak nga bahin, nakakinot sang 102,000 kilowatts ang CENECO matapos ang ginpatigayon nga Earth Hour, halin alas-8:30 tubtub alas-9:30 sa gab-i sang Marso 25.
