Ginapakamaayo sang alkalde sang ciudad sang Bacolod nga tumandok man sang ciudad ang masunod nga city director sang Bacolod City Police Office sa tion nga magretiro na si Police Col. Thomas Joseph Martir sa bulan sang Mayo.
Suno kay Bacolod City Mayor Alfredo Benitez, may mga ngalan na nga nagagwa nga mangin masunod nga city director sang BCPO.
May nakapatigayon naman sang courtesy visit kag nagpresentar sang ila nga kaugalingon.
Suno kay Benitez, bentaha kun taga-Bacolod ang city director bangud saulado sini ang terrain kag indi sini pagpabay-an ang ciudad.
Suno sa alkalde, bukas gihapon ang city government sa mga choices bangud mangin guided man ini sang selection sang national headquarters sang Philippine National Police.
Sa karon, wala pa ini sang hawid nga final shortlist sang mangin masunod nga city director.
