Para sa alkalde sang ciudad sang Cadiz, dako ang mensahe sang presensya ni Israeli Consul to the Philippines Moti Cohen indi lamang sa pamilya ni Loreta Alacre apang sa mga Pilipino man nga sinsero ang Israel government nga magserbe sa Pilipinas.
Sa interview sang Bombo Radyo kay Cadiz City Mayor Salvador “Bading” Escalante, kahapon alas 11 sang udto nag-abot si Cohen sa Cadiz City kag nagpauli alas 2:00 sang hapon.
Suno diri, nagpasalig si Cohen nga santo sa layi sang Israel kun ano ang benepisyo nga mabaton sang Israeli individual nga napatay bangod sa natabo amo man ang mabaton nga benepisyo nga makuha sang Overseas Filipino Workers kaangay ni Loreta kasubong man nga nagpadangat sang bulig pinansyal ini sa pamilya Alacre.
Pahayag sang alkalde, ang presenysa ni Cohen nagapakita nga sinsiro ang Pilipinio nga magserbe sa Israel gani sinsiro man ang pagserbe sang Israel sa Pilipino.
Gin-congratulate man ni Escalante ang tanan nga Overseas Filipino Workers nga nagatrabaho sa Israel nga ila nakuha ang respeto sang Israel paagi sa ila trabaho kag ini isa sa mga butang nga dapat ipabugal.
Ginalauman sa karun ang posible nga pag-abot sang employer ni Loreta para magbisita sa iya haya.
Samtang, natalana nga ilubong si Loreta sa Nobyembre 5, alas 10:00 sang kaagahon sa public cemetery sa Barangay Caduha-an, Cadiz City.
Suno kay Escalante, ang anay buluthuan ni Loreta nga Cadiz National High School nga ginhimo nga isa ka evacuation center, ang igapangalan kay Loreta.
Ini ang pagahingadlan bilang Loreta V. Alacre Memorial Evacuation Center.
