Nagpain ang city government sang Himamaylan sang P23 million gikan sa savings nila sang nakaligad nga tuig agud pakigbatuan ang EL Niño nga nakaapekto sa 19 ka mga barangay.
Sa interview kay Himamaylan City Mayor Mayor Raymund Tongson, may yara sang rekomendasyon ang Office of the Civil Defense nga mahimo na makadeklarar sang state of calamity ang ciudad bangud sa epekto sang El Niño agud nga magamit ang calamity fund apang suno sa alkalde may yara man sila sang savings nga ginagamit sa paghatag bulig sa mga naapektuhan.
Suno kay Tongson, ang pondo ang gamiton sa paghatag sang food packs para sa mga mangunguma, infrastructure projects, kag logistical supplies kaangay sang bomba sang tubig kag mga water hose.
Ginpahayag man sini ang plano sini nga magabakal sang water filtration truck bangud nakita gid sini nga dako ang nabulig sang ginhulam nga filtration truck sang provincial government.
Suno sa alkalde kinahanglan ang filtration ang kinahanglan agud nga may mainum ang mga pumuluyo bangud ang mga bubon ang wala na sang tubig.
Suno pa diri, maayo man nga magdeklarar sila sang state of calamity apang wala pa man sila nagdangat sa punto nga kinahanglan nagid kag nagapanilag pa ini sang sitwasyon sa kaiping sini nga Local Government Unit.
