Ginpasalig sang alkalde sang banwa sang EB Magalona nga wala ginapabay-an ang mga residente sang Hacienda Teresa, Barangay Alicante kasunod sang lockdown nga ginpatuman halin sang Martes kag magalawig sang isa ka semana.
Sa interview sang Bombo Radyo Bacolod kay Mayor Marvin Malacon, halin sang Marso, may ara na sila sang nastock nga duha ka libo ka sako sang bugas agud nga ipanagtag sa mga apektado nga mga residente sang ipatuman nga lockdown.
Suno kay Malacon, kun may reklamo ang mga residente, indi na pag-ipaagi sa social media bangud mahimo man ini madirekta sa Barangay Health Workers (BHW) ukon munisipyo agud gilayon nga masolusyunan.
Ginalantaw man sini nga ang pagreklamo ang ginalaktan sang pulitika.
Ginpahayag man sini nga natapos naman ang disinfection kag ginahulat na lamang ang swab test results sang mga ginkuhaan sang swab sample.
Sa tion nga magnegatibo ang resulta, mahimo na batakon ang lockdown.
Suno sa alkalde, ang ginahimo sang banwa ang para man sa tanan kag nagahingyo ini sang kooperasyon kag magsunod sa mga health protocols nga ginapatuman.
