Nagapanawagan ang alkalde sang Himamaylan, Negros Occidental sa tanan nga Filipino nga mag-isa kag suportahan si Gwendolyne Fourniol, nga ginkoronahan bilang Miss World Philippines 2022 sang Domingo sang gab-i, sa iya pagcompete sa international stage.
Sa interview sang Bombo Radyo kay Mayor Raymund Tongson, proud ini nga nakuha ni Gwendolyne ang korona sa ikaduha sini nga pagpasimpalad sa Miss World Philippines.
Suno kay Tongson, sang 2021, nakigbahin man ini sa nasambit nga kompetisyon kag siya ang nagatapos sa Top 15.
Sang Domingo, suno diri, tuman ka proud ang mga ini sa Negrense beauty queen ilabi na sa iya performance kag pagsabat sang pamangkot.
Suno sa alkalde, sang nagligad nga tuig pa nagsugod ang ila suporta kay Gwendolyne kag sini nga tuig, madamo man nga mga sponsors ang nagbulig sa iya.
Pinakauna nga role sang Himamaylan suno kay Tongson amu ang pagpangamuyo para sa beauty queen, pagsuporta sa iya endeavors kag pagpangayo sang padayon nga suporta sa mga Negrosanon.
Nagapangamuyo man ini nga magsige-sige ang kadalag-an ni Fourniol tubtob sa iya pagcompete sa international stage gani nagapanawagan ini indi lamang sa mga Negrense kundi sa tanan nga Filipino nga mag-isa kag suportahan ang journey ni Gwendolyne sa international stage.
Suno sa iya, isa ini ka oportunidad agud makilala ang Pilipinas sa bilog nga kalibutan paagi sa Ms. World competition.
Ang 21-anyos nga French-Filipino beauty queen ang nagapuyo sa Barangay Poblacion 1, Himamaylan City, Negros Occidental.
