Nagtanyag sang P200,000 nga reward si Hinigaran Mayor Jose Nadie Arceo sa sin-o man nga magawitness agud masolbar ang kaso nahanungod sa pagpatay sa isa ka tricycle driver sa Lopez Jaena St, Barangay 1, Hinigaran, Negros Occidental sang Sabado, Hunyo 4.
Suno kay P/Capt Ryan Villasario, hepe sang Hinigaran Municipal Police Station, ang biktima ang ginkilala kay Leonardo Espinosa alyas Adoy, isa ka tricycle driver kag residente sa Pantalan Daan, sa nasambitan man nga Barangay.
Suno kay Villasario, wala sila sa gihapon sang identity sang suspetsado kag padayon pa ang ila imbestigasyon sa pagpatay sa biktima.
Ginausoy man sang kapulisan ang involvement sang biktima sa mga kaso kaangay nalang sa pinatyanay nga nagluntad sang Desyembre tinalikdan nga tuig may kaangtanan sa inaway sang duha ka pamilya.
Paathag ni Villasario, ang imbestigasyon sa iban nga mga kaso nga imbulbado ang biktima ang isa lang sa anggulo nga ila ginalan-aw.
Apang sa karun, indi pa ang mga ini makaseguro bangod wala pa sila sang mabaskog nga ebidensya.
