Aminado ang alkalde sang banwa sang Hinobaan nga problema sa karon sang banwa ang manabaw nga mga suba sa nasakupan sang LGU nga nagaresulta sa madasig nga pagsaka sang tubig-baha kun mag-ulan.
Sa interview sang Bombo Radyo kay Mayor Ernesto Estrao, madali lang mag-awas ang mga suba sa Hinobaan kun sa diin gilayon nga nagapanglaktod ang tubig bisan indi tuman kadamol ang pagtupa sang ulan.
Nakaplastar naman ang programa sang Hinobaan LGU agud mapadalom ang mga suba.
Kadungan sang madamol nga ulan dala sang Bagyo Dante, natam-an sang pagbaha ang Culipapa, Daug, Bulwangan kag Asia.
Ginabanta suno sa alkalde nga masobra 100 families ang nagbakwit sa Culipapa, masobra 20 sa Barangay Daug, masobra 40 sa Barangay Bulwangan kag masobra 20 sa Barangay Asia.
Maswerte nga madasig ang pagsubside sang tubig gani nakapauli na kahapon ang mga evacuees.
Pila naman sa mga ini ang wala na sang pulian bangud naguba ang ila balay kaangay sang pila ka pamilya sa Bulwangan kag Asia nga naanod gid sang tubig.
Suno kay Estrao, gintugyanan na niya ang Municipal Social Welfare and Development Office nga iassess ang tanan nga nahalitan agud nga mahatagan sang nagakaigo nga bulig nagikan sa LGU.
Ginpakuha man sang alkalde ang damage assessment sa infrastructure, agriculture kag mga kabalayan.
