Ginakasubo sang alkalde sang ciudad sang Kabankalan nga natabo ang engkwentro sa tunga sang 47th Infantry Battalion kag New People’s Army (NPA) sa Purok Lubi, Barangay Tabugon, Kabankalan City sang Huwebes kasunod gid lamang sang Walk for Peace kag Launching sang Sambayanang Negros.
Sa interview sang Bombo Radyo Bacolod kay Kabankalan City Mayor Benjie Miranda, sang aga sang Huwebes, sila ang nagpatigyon sang Walk for Peace launching kapod ang mga opisyal sang 303rd kag 302nd Brigade kag mga Peace advocates.
Ini ang may tinutuyo nga mapangitaan sang solusyon ang problema sa insurhensya nga madugay na wala gihapon matapos.
Kasunod sini alas-3:00 tubtob alas-4:00 sang hapon, si Miranda ang nagpadulong sa syudad sang Bacolod para sa recognition may kaangtanan sa turismo sa probinsya sang Negros Occidental.
Apang kapin alas-7:00 tubtob alas-8:00 sang gab-i siya ang nakabatun sang tawag natuhoy sa nagluntad nga engkwentro, gani wala na sini ginpatapos pa ang programa kag naghingagaw sa pagpauli.
Pagdangat sa syudad, wala man ini gilayon nakasulod sa encounter site bangod padayun pa ang clearing operation sang mga militar, gani nagpadulong nalang ini sa Kabankalan City Police Station agud iturn-over ang ginbakal sini nga mga live ammunitions, bilang donasyon sang City Government.
Suno sa alkalde, nagcontact ini gilayon kay Punong Barangay Ramil Sepida sang Barangay Tabugon, agud maseguro kun may evacuees kag ginseguro sini nga malayo sa pamalay ang ginluntaran sang engkwentro.
Matapos ginpanaog ang mga bangkay, si Miranda ang nag-upod man sa pagdala sini sa punerarya.
Pasalig sini nga kun wala sang may magaclaim sa mga bangkay, bilang alkalde siya ang may responsibilidad nga maghatag sang desinte nga lubong sa mga biktima.
Aminado si Miranda nga yara gihapon ang presensya sang mga rebelde nag grupo partikular na sa mga suludlon na nga mga sitio.
Ginapanawagan na lamang sini sa mga rebelde nga magbulig na lamang sa gobyerno sa pag-address sa mga problema sa pungsod bangod wala sang maayo nga resulta ang away sa tunga sang parehas nga Pilipino.
Dugang pa sang alkalde nga ginatinguhaan man sang gobyerno nga ihatag ang mga ginapangayo sang mga rebelde kaangay sang duta kag palangabuhian, nga ginahatag sa mga nagabalik sa sabak sang gobyerno.
