Tuman ang kalipay sang alkalde sang La Castellana, Negros Occidental matapos nga nakasulod ang Bailes De Luces sa grand finals sang World Championships of Performing Arts (WCOPA) nga ginapatigayon sa Long Beach, California.
Sa interview sang Bombo Radyo Bacolod kay La Castellana Mayor Alme Rhummyla Nicor-Mangilimutan, nakasulod kahapon ang Bailes De Luces sa grand finals kag subong nga adlaw magaperform ang mga ini para sa grand finals competition.
Suno sa iya, humalin ini nga nagpungko bilang alkalde sang banwa sang La Castellana, kaangay sang mga dancers sang Bailes De Luces, handum sini nga makaperform ang mga ini sa WCOPA kag ini ang natuman.
Aminado man ang alkalde nga indi man mahapos ang ila gin-agyan antes nakasulod sa grand finals.
Ginalantaw nga sa July 6 may yara man sila sang event.
Ginpahayag man ni Mangilimutan nga kapin P6 million ang nagasto nila agud nga makapadulong sa California, USA agud nga magperform sa WCOPA.
Ginpasalamatan sini ang tanan nga nagbulig kag suno diri, ang gobernador ang personal nga naghatag sang P1 million agud nga idugang para sa ila nga pamasahe.
Nangin emosyonal man ang alkalde bangud nangin madinalag-on ang performance sang Bailes De Luces Dancers kag dako ang pasalamat sini bangud indi lang La Castellana ang ila ginarepresent kundi bug-os nga Pilipinas.
