Ginkalipay sang alkalde sang banwa sang La Castellana ang pag-alokar ni Senator Risa Hontiveros nga P60 million sa pagpatukod sang mga evacuation centers.
Sa interview sang Bombo Radyo Bacolod kay La Castellana Mayor Añejo Nicor, ang P60 million dako na nga bulig sa ila banwa ilabi na sa mga biktima sang paglupok sang bulkan Kanlaon nga dapat may yara sang permanente nga evacuation center sangsa nga maghulam sila permi sa mga buluthuan.
Ini naga-apekto sa klase sang mga kabataan kun sa diin indi sila dali-dali makabalik sa klase.
Suno kay Nicor, kaangay nga danger zone na ang banwa sa tanan nga naagyan sini halin sa paglupok sang bulkan, linog kag pagbaha.
May yara na sang nabakal nga lote ang provincial government sang Negros Occidental sa Brgy Talaptap para patindogan sang evacuation center.
