Ginpahayag sang alkalde sang banwa sang La Castellana nga kapin 200 ka indibidwal ang nagapuyo sa sulod sang 4km radius Permanent Danger Zone sang Bulkan Kanlaon.
Sa interview sang Bombo Radyo Bacolod kay La Castellana Mayor Rhummayla Nicor Mangilimutan, ang yara sa sulod sang 4km radius ang gikan sa Barangay Masulog, Biak na Bato kag Cabagnaan kag kalabanan sa mga residente ang mangunguma.
Nagapati ang alkalde nga ginpili sang mga ini nga magpuyo sa ibabaw bangod sila ang wala sang mapuy-an sa idalom.
Pabor ang alkalde nga madumilian na ang pagpuyo sa 4km radius Permanent Danger Zone kag sila ang magabutang man sang flaglets nga magatumod sa mga boundaries.
Apang aminado si Mangilimutan nga kinahanglan ang pondo sang National Government sa rellocation bangod ini ang indi masarangan sang banwa kag probinsya sang Negros Occidental.
Nagpatigayon naman sang debriefing kahapon ang Disaster Risk Reduction and Management Council kag gin-assess man kun sarang na nga makapauli ang pila sa mga evacuees.
As of kahapon, may kapin 800 ka pamilya nga yara sa evacuation centers ukon kapin isa ka libo ka pamilya kaupod ang mga outside evacuation centers.
