Nagpasalamat si Mayor Ella Celestina Garcia-Yulo sang banwa sang Moises Padilla, Negros Occidental nga nahatagan na sang hustisya ang illegal checkpoint, iligal nga pagdakop kag pagtanom sang ebidensya batok sa ila nga duha sang iya bana nga si Felix Mathias Yulo III sang anum ka mga kapulisan, kalakip na ang anay hepe sang banwa sadtong Desyembre 19, 2017.
Ginakalipay sang alkalde ang disisyon sang National Police Commission (NAPOLCOM), kun sa diin gindismiss sa serbisyo ang mga natungdan nga sanday Police Captain Allan Reloj, anay hepe sa Moises Padilla Municipal Police Station kag lima ka mga kaupod nga sanday Police Master Sgt. Ricardo Dingcong Jr., Police Corporal Nobel Perante, Police Corporal Felis Pesales Jr., Patrolman Michael Mondido kag Patrolman Darryl Dormido.
Una man sini nga ginpasalamatan ang Ginoo, kasubong man ang mga himata nga nagsuporta sa ila nga mag-asawa sa pag-atubang sa kaso, kalakip na ang mga pumuluyo sang Moises Padilla nga nagpati sa ila.
Suno kay Yulo, ang desisyon sang NAPOLCOM ang nagapamatuod nga iligal ang ginpatigayon nga checkpoint operation.
Dugang pa sini nga planted ang pila ka mga ebidensya batok sa ila, gani tuman ang pagpasalamat sini sa tanan nga nagbulig pangamuyo nga mahatagan sang kasanagan ang kaso.
Hugot ang panindugan sang alkalde nga ang pinakamabaskog nila nga armas amo ang pangamuyo gikan sa maathag nga political harrasment.
Suno kay Yulo, ginreklamo nila sa NAPOLCOM ang hitabo kag ginpasaka ang kaso nga administratibo.
Samtang ginpakigbahin man sini nga nagasegi naman ang ila nga pag-atubang sa ila nga kaso sa korte maykaangtanan sa illegal possession of fire arms, illegal possession of explosives kag direct assault.
Paathag naman sini nga wala nalakip ang sa narecover nga shabu bangod napamatud-an nga indi ini shabu sang gindala sa crime laboratory.
Nagapati naman ini nga dako ang mabulig sang desisyon sang NAPOLCOM sa ila ginapangatubang nga kaso.
Samtang mensahe naman sini sa pasimuno sang natabo nga political harrasment nga magbalik na sa Ginoo bangod apisar nga indi nya na ini mapasaylo, nagapati ang alkalde nga mapasaylo ini sang Diyos.
