Nagpadulong sa estasyon sang Bombo Radyo Bacolod para magreklamo ang residente sang banwa sang Murcia nga nadulaan sang balay bangod sa bagyo Tino apang wala gid sang may nabaton nga financial assistance.
Sa interview kay Editha Ortega, residente sang Brgy Iglau-an, nagpadulong ini sa ila Brgy Hall para mangayo sang bulig apang ginhambalan sila nga magpadulong sa Department of Social Welfare and Development.
Pag-abot sa DSWD, ginhambalan naman sila nga sa ila brgy lamang magpalista.
Suno kay Ortega, ginpasalig sa ila nga napasa ang ila pangalan apang wala man sila sang may nabaton nga bulig pinansyal.
Sa karun, nagpatukod lamang sila anay sang hayob-hayob nga balay. Samtang, gin-athag sang alkalde sang banwa sang Murcia nga hugot ang ila pag-evaluate sa ginahatagan sang financial assistance bangod ang pondo naggikan mismo sa Local Government Unit.
Sa interview sang Bombo Radyo kay Mayor Gerry Rojas, gamay lamang ang pondo halin sa calamity fund sang banwa amo nga madutay lamang ang macover sini.
Suno diri, gina-evaluate gid nila ang nagapalista bangod iban nagahambal nga dako ang guba sang ila balay bisan nga minor lamang.
Suno sa alkalde, kun intindihon gid sini ang tanan para mahatagan sang bulig basi kun makabaton na lang sang tig- P100 tubtob P300 na lang ang kada isa.
Sa karun, 212 ka indibidwal ang nakabaton sang bulig nga P3,000 para sa may partially damaged nga balay samtang P5,000 naman sa totally damaged ang balay.
Pahayag ni Rojas, ang mga wala nahatagan sa karun sang financial assistance, napadala na ang ila pangalan sa (Department of Social Welfare and Development (DSWD) national office kun sa diin nagdangat sa kapin P9,000 ka mga tawo ang nalakip sa lista… ginpa-athag sang head sang Murcia Municipal Social Welfare and Development Office (MSWDO) kun paano ginapili ang mahatagan sang financial assistance.
Sa interview kay Charisma Olimpo, head sang Murcia MSWDO, ang mga pumuluyo nagapalapit sa Brgy para magpalista kag ini magalabay sa evaluation.
Suno diri, ang listahan ginapadala sa DSWD nga liwat naman nga maga-evaluate kun sin-o ang nagakadapat nga mahatagan sang bulig pinansyal.
Pahayag sini, ang nahatagan sa karun amo lamang ang naka-una palista apang nagpasalig naman ini nga ang wala nakahingagaw, ginlakip ang ila pangalan sa listahan nga ginpasa sa DSWD bangod sila ang makabaton naman sang ayuda halin mismo sa national office.
