Ginasundan man sang alkalde sa banwa sang Murcia ang imbestigasyon sang kapulisan angot sa insidente sang pagpangawat sang solar street lights sa banwa.
Sa interview sang Bombo Radyo Bacolod kay Murcia Mayor Gerry Rojas, dako nga problema ang natabo nga pagpangawat sang onse ka mga solar street light kag pagpanumba sang mga poste sa Barangay Santa Cruz, sa nasambitan nga banwa.
Paathag sang alkalde nga ang mga ini ang ila ginbutang agud kuntani mangin masanag ang dalanon apang may-ara sang grupo nga nagatarget sa nasambitan nga mga butang.
Dugang pa sini nga ginakabig man nila nga development sa kaso ang pagkasapo sang bangkay ni John Paul Gayte residente sa Purok Gaisano, Barangay Alijis, Bacolod City, mismo sa lugar kun diin ginkawat ang mga solar street lights kag katupad man mismo sang bangkay ang solar panel.
Suno kay Rojas, may mga ginatutukan na nga anggulo ang kapulisan kun sa diin mahimo ang bangkay ang ginbilin lang sa lugar ukon ini ang ginpatay samtang yara sa akto sang pagpangawat.
Ang biktima ang nag-agom sang pilas sa ulo, nawong, kag ibabaw nga bahin sang lawas.
Panawagan sang alkalde sa mga barangay tanod nga mangin vigilante partikular na sa tion sang kagab-ihon.
Paathag sini nga mga propiedad sang gobyerno ang ginpangawat kun sa diin kalakip sa ila mga nangin priority agud indi na magsalig sa kuryente ang tagsa ka mga barangay.
Apang pahanumdom ni Rojas nga may mga nagapangawat sang solar lights kag ini ang ginabaligya kun sa diin may nabatun ini nga impormasyon nga ginabaligya ang second-hand nga solar lights sa balor nga P800.
Suno sa alkalde, ang solar lights sa orihinal nila nga pagbakal ang nagabalor sang P4,500 tubtob P5,000.
Pahanumdom ni Rojas sa mga pumuluyo nga kun may magtanyag sang tuman ka barato kag second hand nga mga solar lights, hibaluon danay kun ang mga ini ang may resibo bangod mahimo nga ini ang kinawatan.
