Aminado man ang alkalde sang banwa sang Pontevedra nga nagadamo ang mga pumuluyo nga luyag magpabakuna sa karon bangud sa paandam sang gobyerno nga mabudlay ang mga transactions sang wala nabakunahan.
Suno kay Mayor Jose Maria Alonso, indi maakomodar ang tanan nga nagapila sa gym sang banwa tinalikdan nga inadlaw bangud isa lang ka team ang nagabakuna kun sa diin may yara sang isa ka doktor sa team.
Duha naman ka semana nga masobra isa ka libo ang mabakunahan sa banwa sang Pontevedra kada adlaw.
Sang tinalikdan nga tuig suno kay Alonso, hesitant ukon nagapang-alang-alang ang mga pumuluyo nga magpabakuna kag indi gid tuman kadamo ang supply sang bakuna gani indi man tuman kadamo ang mabakunahan.
Humalin sang nagdamo ang nagapila agud nga magpabakuna, ginahatagan na sang Pontevedra LGU sang numero ang mga pumuluyo kag ang indi malab-utan sang numero sa amo nga adlaw ang ginapapauli nalang.
Sa pihak sini, may iban gihapon nga pumuluyo nga nagabalibad nga magpauli bisan wala na sang numero.
Humalin kahapon, indi na tuman ang ginutok sang mga pumuluyo sa gym sang banwa bangud sa sistema nga gingamit sang LGU.
