Ginpasalamatan sang alkalde sang syudad sang Silay ang tanan nga mga empleyado sang Silay City government, stakeholders kag tanan nga mga pumuluyo kasubong man sa mga nagsuporta sa mga ginapatigayon sini nga proyekto sa nasambit nga syudad nga isa sa mga nangin rason nga makakuha siya sang maayo nga performance rating.
Madumduman nga nakuha pareho sang mga alkalde sang syudad sang Bacolod kag Iloilo ang una nga pwesto kag nakuha naman sang alkalde sang syudad sang Silay ang ika-12 nga pwesto sa Top Performing City Mayor.
Sa interview sang Bombo Radyo Bacolod kay Silay City Mayor Joedith Gallego, pila sa mga proyekto sini amo ang sa infrastructure kaangay sang pagpakay-o sang taytay sa Barangay Rizal kun sa diin nagaangot sa E. Lopez, Hacienda Guisang-an Dos kag Hacienda Makina.
Suno kay Gallego ang nasambit nga taytay humalin sang-una wala gid ini matalupangdan gani sa karun nalipay na ang mga tawo nga napakay-o na ini kag manami na nga agyan.
Ginpahayag man sini nga ang tanan nga mga dalan sa mga na-uma nga bahin sang syudad ang ginahatagan na sang atensyon kag kun indi man mapasemento, ginatinguhaan sini nga mapakay-o agud indi tuman ka lubak-lubak kun agyan sang mga tawo.
Isa man sa proyekto sini ang pagpatindog sang bag-o nga police station.
Ginkalipay man sang mga senior citizens bangud kabahin sang programa sang alkalde amo pagdoble sang cash assistance nagikan sa P300 nangin P600 na ang mabaton sang mga ini nagikan sa syudad.
Magluwas pagkilala nga nakuha bilang Top Performing City Mayor, nakakuha man ang alkalde sang Gawad Kalasag kag sa karun ginatinguhaan man nila nga malakip sa Sandugo awardees subong nga tuig.
